【「a家」生活】家有「初陽」點算好？確診長者照顧指南！

2019冠狀病毒疫情嚴峻，家中長者若果確診，家人們又可以點做呢？以下就有照顧確診長者嘅8個小貼士俾大家參考一下：

1. 讓長者知情
最好讓當時人知情。若然長者患有認知障礙症，唔需要仔細解釋例如咩係Omicron，可以用簡單問題了解長者情況：「你有冇發現你有鼻塞、喉嚨痛？」令認知障礙症人士亦知道生病，咁樣會較為願意合作。

2. 盡量保持距離
一般建議照顧者與同住確診者保持距離，但若然長者未必能自己照顧自己，照顧者就要按情況加強保護措施。例如患者想去屋企某地方，或使用某物件，可以隨長者心意，照顧者事後再進行消毒。如果患者唔願意長期配戴口罩，照顧者更需注意自我保護，時刻配戴口罩。

3. 定好時間表
長者如果已出現病徵，照顧者可定好時間表：定時探熱、服藥、用膳及休息。白紙黑字或寫於一塊板上，就更清楚易明。

4. 親身示範
由於長者，特別係認知障礙症患者未必識得自行探熱同服藥，照顧者可以親身示範，如照顧者拎糖食，病人就拎藥食；但千其唔好責罵佢唔食藥，咁會令對方懷疑你俾嘅藥物是什麼。

5. 協助服藥
如長者有吞嚥困難，照顧者可將藥粒切半。患者未必會合作吃藥，亦有可能因為喉嚨痛而拒絕服藥，照顧者可以將藥物拌以少量蜜糖或蜜糖水，中和藥物苦味。

6. 補充維他命
為舒緩患病引起嘅不適症狀，並減少因痛症而引起情緒波動或行為問題，長者可服用維他命C沖劑、蜜糖或軟身喉糖。長者亦要時刻多喝水，每日喝 1000 至1500 毫升，最好用水樽，照顧者要一齊飲，以免令患者覺得唔明白點解只有自己要飲。

7. 注意衛生
染疫長者可能頻頻打噴嚏或吐痰，照顧者可以喺佢哋日常出沒嘅地方，如房間、床頭、茶几等準備紙巾，讓長者輕易取得清潔用品。

8. 小心採樣
如染疫長者唔識使用快速檢測套裝，照顧者就需要親自為長者採樣。政府專家顧問許樹昌建議，照顧者採樣時要盡量配戴兩個口罩同護目鏡，並企喺長者旁邊採樣，避免與長者面對面，減少長者向前打噴嚏時被飛沫濺到的機會。

咁關鍵嘅時刻，家中長者更需要照顧者，大家一齊同心協力對抗疫情，亦要同時保護自己同身邊家人，減少外出，保重身體！

資料來源：賽馬會「a家」樂齡科技教育及租賃服務